ԳՆԱՀԱՏԱՆՔԻ ԵՐԵԿՈՅ

Անցնող շաբաթւայ մէջ, հինգշաբթի փետրւար 21-ի երեկոյեան, միութեանս անդամները ներկայ գտնւեցին իր բնոյթով թերեւս հազւադէպ պատահող մի թէյասեղանի, որտեղ մի անգամ եւս պարտաճանաչ, յանձնառու եւ գործունեայ ճանաչւած մի միութենական գնահատւեց իր աւելի քան քսանամեայ միութենական ծառայութեան համար, օրինակ դառնալու համար միութենական կեանքին եւ պահանջներին դեռեւս անծանօթ նոր անդամագրւող միութենականներին: Այդ օրը, միութեան վարչութեան նախաձեռնած թէյասեղանի միջոցով գնահատւում էր միութենական օր. Անահիտ Ղուկասեանը, որ աւելի քան քսան տարիներից ի վեր բոլորի վկայութեամբ, ամենայն ձեռներեցութեամբ ղեկավարում է միութեանս կենտրոնատեղիի գրասենեակի աշխատանքները՝ սկզբնապէս ժամանակաւոր կերպով փոխարինելու համար արձակուրդի գնացող գրասենեակի պաշտօնեային, որը սակայն մնայուն տեսք ստացաւ հասնելու համար քսան տարիների մի երկարատեւ շրջանի:

Թէյասեղանին հրաւիրւած էին նախկին շրջանների վարչական կազմի նախագահներ եւ անդամներ, միութենական յանձնախմբերի եւ աշխատանքային միաւորների անդամներ, եւ ներկայիս գործունեայ միութենականներ, թւով շուրջ 60 հոգի:

Վարչութեան նախագահ Շապին Աբրամեանի կողմից երեկոն բացւած յայտարարւելուց յետոյ, օր. Անահիտ Ղուկասեանի համառօտ կենսագրութիւնը ընթերցեց վարչութեան քարտուղար օր. Սերինէ Ռոստոմեանը, որից ներկաները տեղեկացան նրա թէ միութենական եւ թէ հասարակական կեանքում ունեցած գործունէութեան եւ յանձնառութիւնների մասին: Այնուհետ ներկաները հրաւիրւեցին իրենց անձնական տպաւորութիւնները յայտնելու օր. Անահիտի որպէս գրասենեակային պատասխանատուի տարած աշխատանքի եւ դրսեւորած նկարագրի մասին, այն կերպ ինչ որ պահպանւած է իրենց յուշերում: Այս առիթով, մեծ թւով ներկաներ իրենց գնահատական արտայայտութիւններն ունեցան՝ հաստատելով նրա գործունէութեան միջից դրսեւորւող պարտաճանաչ, ուղղամիտ, ամբողջական պատասխանատւութեամբ, միութենական հարցերին ամբողջապէս տիրապետող մի անդամի նկարագիրը: Իսկ աւելի երիտասարդ անդամներ, թէ վարչական կազմերից եւ թէ միութենական տարբեր խմբակներից, իրենց խօսքերի մէջ շեշտում էին որ լինելով օր. Անահիտից տարիքային աւելի ցածր խմբում եւ միութենական կեանքի աւելի պակաս փորձառութեամբ, միութենական աշխատանքների իրագործման ընթացքում, շարունակաբար իրենց վրայ զգացել են նրա առաջնորդող օգնութիւնների եւ տւած ուղղութիւնների բարերար ազդեցութիւնը: Տարեց միութենականների մօտ օր. Անահիտ Ղուկասեանը ներկայացւեց եւ գնահատւեց որպէս պարտաճանաչ, պատրաստակամ, պատասխանատւութեան բարձր գիտակցութեամբ, միութենական հարցերին ամբողջապէս տիրապետող մի անդամ:

Սոյն երեկոյի առիթով գնահատւեցին եւ յուշագրեր ստացան նաեւ թւով տաս երիտասարդ միութենականներ, որոնք վարչութեան գնահատմամբ համարւում են ամենից աշխատունակ եւ գործունեայ անդամներից, արժանանալով ներկաների ծափահարութեանը:

Ապա վարչութեան ներկայ նախագահի եւ նախորդ շրջանների նախագահների ձեռամբ յիշատակի նւէր յանձնւեց Անահիտ Ղուկասեանին, մաղթելով նրան ապագայի համար ամենայն յաջողութիւն եւ ուրախութիւն:

Թէյասեղանի ընթացքին, տեղի ունեցաւ թեթեւ հիւրասիրութիւն: Հանդիպումն աւարտւեց ներկաների հաւաքական յիշատակի խմբանկարով:

ՀՀԸՄ-ի թղթակից
2019 փետրւար 21